Et ass eppes Besonnesches, eng Serie ouni Erwaardungen unzefänken an da komplett drop hänken ze bleiwen. Genee dat ass mir mat Murder Mindfully geschitt. Ech hat ni dovun héieren, wousst net, datt se op enger däitscher Bicher-Serie baséiert, an Netflix huet se mir einfach zoufälleg proposéiert – woubäi “zoufälleg”… . A wat als einfach Mol raluussen ugefaangen huet, ass séier zu enger Erfarung ginn – eng, déi mech wierklech geprägt huet.

Eng Krimigeschicht ouni Längten

Verschidde Krimiserien hunn de Problem, datt se sech zéien, mat onnéidege laange Szenen oder Fëllmaterial, oder mat schwéierfälleg éiwegdauernden Erklärungen. Murder Mindfully mécht dat net. Den Tempo ass flott a konstant, mat gudder Dynamik a kengem eenzege langweilege Moment.

Visuell an akustesch eng absolut Erfahrung

D’Serie weist net nëmmen d’Thema “Mindfulness”, se fillt sech och esou un. Wann d’Thema bewosst an der Serie opdaucht, gëtt d’Bild dreemeg, méi roueg, méi schéin. De Sound gëtt méi déif, méi entspaant. Et ass sou gutt gemaach, datt een als Zuschauer automatesch matzitt.

Eng genial Humor-Mëschung

Dës Serie huet en intelligenten, dréchenen Humor. Wann dir scharf Dialoger mat vill Ironie gär hutt, wäert dir se feieren. Et gëtt och humorvoll Situatiounen, mee d’Dialoger si wierklech den Highlight.

Eng Serie fir all déi, déi sech iwwerfuerdert fillen

Dës Serie ass net just en Thriller – se ass eng Reflexioun iwwer eist hektescht Liewen. D’Rees vum Haaptpersonnage léisst een och eppes fir sech selwer mathuelen. A méngem Fall ass genau dat geschitt.

Ech hunn duerno net nëmmen d’Bicher mee souguer d’Hörbicher kaaft, an hunn ugefaange mech aktiv mat Mindfulness ze beschäftegen, Bicher driwwer gelies a souguer eng Aktioun mat menge Kollegen op der Aarbecht dozou preparéiert (ech iwwerloossen et ärer Virstellung wéieng 😜).

Mäi Fazit: Dir musst dës Serie kucken!

Wann dir dréchenen Humor, gutt Kriminalgeschichten a Charaktere mat Déift gär hutt, ass dës Serie perfekt. An wann dir Iech jeemools gestresst oder mental iwwerfuerdert gefillt hutt, kann Murder Mindfully genau dat richtegt fir iech sinn.

Heiansdo sinn déi bescht Serien déi, déi ee guer net erwaart. Kuckt se elo op Netflix.